De Brune Biel

Kimmet man von Holingen an dän Barje hoch no`n Sunneschteine, denn führt der Wech wier dorch dat „Eichsfelder Dor“ no Brähme, Eilingero un Durschtadt. Up der linken Site, an der Grosefast, sitt man en`n eijenortijen Barch len, der utsitt wie en Zuckerhaut. Dat is der Brune Biel. Weil sek dä Lie freuher nich erklärn kun`n, wie dieser Huckel hierher ekom`n sin kann, het se sek verschiedene Sagen utedacht:


De Brune Biel

Vor langer, langer Tit kamp mol en Riese up siner Wanderunge von der Mark Brandenburch no`n Rheine in unse Gejend. Hei kamp von Nordhusen ower Blichero, Bodingen un Bischpro no Holingen. Von hier ut wolle hei wier no Durschtadt wandern. Wie hei nune von Holingen an dän Sunneschtein kimmet un dorch dat „Eichsfelder Dor“ schun dä Schtadt do leen sitt, owerkimmet `ne ene grote Freude. Der Anblick is so echt, dat hei sek hier erst mol en betchen in`t Gras leen un utrouen will. Dobie will hei sine groten Schtewele utteien, weil sek dodrine so vele Sand ut der Mark Brandenburch anesammelt het. Hei ticht also beide Schtewele ut, nimmet se in dä Hand un schittet dän Sand vor sek hen, so dat en riesengroter Hucken entschteit. Denn lecht hei sek tefren tericke un schleppet erst mol `ne ganze Wiele.
Un dono geit hei wier in Richtung Durschtadt. Dat alles het en por Urinwohner von Holingen eseien, dä sek ut luter Angest vor dän Riesen in`n Jebüsche verschtoken het. Un schpeter, wie sek andere Lie ut Holingen un Brähme ower dän groten Dreckhucken wundert, kent se `ne erklärn, dat hei von en`n Riesen schtammet. Von der Tit an heitet dieser Barch „Riesenhügel“ oder „Bruner Biel“.

 

Et kann ower ok anders ewest sin. Manniche Lie vertellt nämlich dä Jeschichte ganz anders: Enmol het se in`n Himmele en grotes Fest efiert, un dobie is von dän helijen Scheuen der Himmelsbewohner ganz vele Dreck afefalln. Wo solln dä Engele an`n nächsten Do bi`n Blankmoken met dän veeln Drecke hen? Lange schtot se do un wetet nich, wat se moken selt. Ower do het en kleiner Engel en`n echten Infall. Ganz upjeret secht hei: „Ek weit Rot. Rapet mol dän Helijen Petrus! Der kann uns nämlich helpen.“ Un so moket se dat ok. Petrus kimmet, denn schuwet se alle tesammn ´ne grote Wolken wech, un ener von dän Engeln kehrt dän Dreck dorch dat Loch runger up dä Ärn. Un dat was jenau an`n Eichsfelder Dore mank dän Sunneschteine un dän Ohmjebirje! Ob woll deshalb hier in`n Freujohre immer so vele „Himmelschlüsselchen“ wasset? Der Dreckhucken heitet jetz „Bruner Biel.“