Dä Wilde Kerken

Wer von Hauröden oder von Holingen ut mol ene echte Wanderung moken will, der kann entweder up dän Ohmbarje oder up der Wesen hingern Schachte lang egon. An ener Schtee sitt man en`n Felsen len, dän se dä „Wilde Kerken“ nennt. Freuher sin dä jungen Lie von Holingen hier immer noch rimmer eschprungen un sogor up dän Felsen rupeschten. Diser Felsen, der wohrschienlich freuher mol dorch Witterungsinflüsse von dän Ohmbarje afeschpalten worn is, sall no der Sage der Rest von ener Kerken sin. Sogor der Helije Bonifozius sall bi sinen Bekehrungsreisen schun hier ewest sin un jeden Dach tan`n Bän up en`n Felsen eschten sin, dän se hite noch dä „Wilde Kerken“ nennt. Wenn man mit oln Lien ut Holingen schprecket un no der Kerken frecht, vertellt dä ganz jeheimnisvull, dat dat wohrhaftich wohr sin sall: Vor ganz langer Tit sall nämlich ene Froue dise Kerken eseien hemn. Un dat kamp so:

 

Enmol is en Mann ut Holingen tan`n Holtmoken up dän Ohmbarch egon. In der Middachstit kimmet sine Froue un bringet `ne dat Middosebrot. Denn sittet sek dä beiden tan`n Äten in dat Gras un vertellt sek wat.... Ower up enmol hart se in der Nähe einen eijenortijen Glockenton. Dat Jebimmele is so echt, dat dä Froue neigierich werd un upschpringet, weil se nokucken will, wo dat herkimmet. Se leppet dorch dat Dickicht immer dän echten Klange no.

Un wie se ut dän Jebüsche trett, schteit se up enmol vor ener wundeboren groten Kerken mit hohen, bunten Fenstern, dä orntlich in der Sunne glänzet; un om`n in dän Turme hänget ene silberwitte Glocken, dä immertau bimmelt. Weil dä Kerkender wit ope schteit, geit dä Froue ganz vorsichtich un ziemlich bange up dä Kerken tau un kucket langsom imme dä Ecken tar Der rin. Ower ehr Herze fänget noch mehr an te kloppen, denn in der Kerken is so ene feierliche Schtimmunge, dat se dat gor nich glam`n kann:

Hundertdousende Kerzen brennt an dän Hochaltore, un man hart en`n eijenortijen Orjelklang. Forne an dän Altore schteit en griser Bischof in wunderschenen Kerkenjewändern un singet mit echter, deiper Mänderschtimme en litaneiortijes Lied.

Vor dän Bischowe up der Ärn kneiet vele Lie in fremetländischer Kleidunge un antwort up dän Litaneijesang. Dä Froue ut Holingen, dä ehrn On kaum trouen kann, blift vor luter Schtaun`n un ganz verzauwert noch `ne ganze Wile vor der Der schton.

Ower denn leppet se ganz schnelle tericke bi ehrn Mann un will, dat hei mekimmet un sek dat Wunder ankucket, denn freuher het man hier noch nie ene Kerken eseien. Wie dä beiden upjereten Lie henkomet an dä Schtee, wo dä Froue dat alles eseien het, is ower kene Kerken mehr do, un man hart ok kene Glocken mehr lien un kene Orjel mehr schpeln. Dä Froue mut also ene „Wilde Kerken“ eseien hem`n!